نئی دہلی: دہلی پولیس نے ایک بڑی کارروائی کرتے ہوئے بگ باس فاتح اور اسٹینڈ اپ کامیڈین منور فاروقی کو قتل کرنے کی سازش ناکام بنا دی۔ پولیس کے مطابق اس منصوبے میں شامل گولڈی برار گینگ کے دو شوٹرز کو ایک جھڑپ کے دوران گرفتار کر لیا گیا۔
پولیس نے بتایا کہ گرفتار افراد کی شناخت راہول اور ساحل کے ناموں سے ہوئی ہے۔ یہ دونوں ملزمان منور فاروقی پر حملہ کرنے کے لیے بھیجے گئے تھے اور انہوں نے ممبئی اور بنگلور میں ان کی نقل و حرکت کی ریکی بھی کی تھی۔
تحقیقات سے انکشاف ہوا ہے کہ یہ منصوبہ گینگسٹر روہت گودارا کی ہدایت پر بنایا گیا تھا جبکہ گولڈی برار گینگ کو اس میں ویرندر چران کی معاونت بھی حاصل تھی۔
جھڑپ کے دوران ملزم راہول کو گولی لگی جس کے بعد اسے اسپتال منتقل کیا گیا۔ پولیس کے مطابق راہول پر اس سے قبل بھی کئی سنگین مقدمات درج ہیں، جن میں دسمبر 2024 میں ہریانہ میں ہونے والا ایک تہرے قتل کا کیس بھی شامل ہے۔
پولیس حکام کا کہنا ہے کہ اس کارروائی سے منور فاروقی کی جان کو لاحق بڑا خطرہ ٹل گیا ہے۔ مزید تحقیقات جاری ہیں اور امکان ہے کہ اس گینگ کے دیگر افراد کو بھی جلد گرفتار کر لیا جائے گا۔
