گجرات کے علاقے کھاریاں میں گورنمنٹ گریجویٹ کالج کے پرنسپل کو اُس وقت شوکاز نوٹس جاری کیا گیا جب کالج کی عمارت پر وزیرِاعلیٰ پنجاب مریم نواز کی تصویر والا پرچم لہرایا گیا۔
سرکاری ذرائع کے مطابق، یہ واقعہ اس وقت منظرِ عام پر آیا جب پرچم کی ویڈیو سوشل میڈیا پر وائرل ہوئی، جس کے بعد محکمہ اعلیٰ تعلیم (HED) نے فوری ایکشن لیا۔
ڈائریکٹر کالجز شوائب عاشق بٹ کی جانب سے جاری کیے گئے نوٹس میں کہا گیا ہے کہ اس واقعے کی ویڈیو کے وائرل ہونے سے محکمے اور انتظامیہ دونوں کو شرمندگی کا سامنا کرنا پڑا۔ نوٹس میں یہ بھی بتایا گیا کہ پرچم بغیر مجاز اتھارٹی کی پیشگی اجازت کے لہرایا گیا، جو غفلت اور بدانتظامی کے زمرے میں آتا ہے۔
پرنسپل کو ہدایت کی گئی ہے کہ وہ تحریری وضاحت جمع کروائیں کہ ان کے خلاف تادیبی کارروائی کیوں نہ کی جائے۔ نوٹس کے بعد متنازعہ پرچم کو فوری طور پر کالج کی عمارت سے اتار دیا گیا۔
