کراچی،: شہرِ قائد میں خوراک کی صنعت کو ہلا دینے والا انکشاف — پولیس نے کارروائی کرتے ہوئے مردہ مرغیوں کے گوشت کی فراہمی میں ملوث گروہ کو بے نقاب کر دیا۔
گلبرگ پولیس نے فیڈرل بی ایریا موسیٰ کالونی میں ریلوے پھاٹک کے قریب ایک گودام پر چھاپہ مارا، جہاں سے 80 کلو مردہ مرغیوں کا گوشت برآمد ہوا۔ کارروائی کے دوران انوار عرف علی بنگالی اور کمال نامی دو ملزمان کو گرفتار کیا گیا۔
پولیس کے مطابق ملزمان مبینہ طور پر یہی مردہ گوشت شہر کے مختلف فاسٹ فوڈ سینٹرز، بریانی پوائنٹس اور ہوٹلوں کو فراہم کرتے تھے۔ اطلاع ملنے پر سندھ فوڈ کنٹرول اتھارٹی کے افسران بھی موقع پر پہنچے اور گوشت کے نمونے لیبارٹری معائنے کے لیے سیل کر دیے۔
ابتدائی تحقیقات میں انکشاف ہوا ہے کہ یہ نیٹ ورک طویل عرصے سے فعال تھا، جو عوام کی صحت سے کھیل کر منافع کما رہا تھا۔
پولیس نے اس سنگین جرم میں ملوث افراد کے خلاف سخت کارروائی کا عندیہ دیا ہے۔
