کراچی، اکتوبر 2025:
علیگڑھ انسٹیٹیوٹ آف ٹیکنالوجی (AIT) کی طالبات نے قائدِ ملت کوئز کمپیٹیشن 2025 میں نمایاں کامیابی حاصل کی۔ یہ مقابلہ پاکستان کوئز سوسائٹی انٹرنیشنل کے زیرِ اہتمام لیاقت نیشنل اسپتال کراچی میں شہیدِ ملت لیاقت علی خانؒ کے 74ویں یومِ شہادت کے موقع پر منعقد ہوا۔
ملک بھر کی 52 ٹیموں — جن میں لیاقت نیشنل یونیورسٹی، ضیاء الدین یونیورسٹی، ڈاؤ یونیورسٹی، اور جناح سندھ میڈیکل یونیورسٹی شامل تھیں — میں سے AIT کی آرکیٹیکچر ڈیپارٹمنٹ کی فرسٹ ایئر طالبات حفصہ زوہیب اور المیرا ارشد نے اپنی ذہانت، اعتماد اور بہترین تیاری کے بل بوتے پر دوسری پوزیشن حاصل کی۔
تقریب کی صدارت معروف مصنف ڈاکٹر محمد رضا کاظمی نے کی، جبکہ مہمانِ خصوصی محفوظ النبی خان (قائم مقام صدر، لیاقت علی خان میموریل سوسائٹی)، پروفیسر ڈاکٹر سلمان فریدی (میڈیکل ڈائریکٹر، لیاقت نیشنل اسپتال) اور ڈاکٹر الطاف مکاتی (وائس پریزیڈنٹ، SZABIST) تھے۔
کنوینر AIT سید محمد محسن کاظم نے اس کامیابی کو طالبات کی محنت اور اساتذہ کی رہنمائی کا نتیجہ قرار دیا۔ پرنسپل شاہد جمیل نے کہا کہ “حفصہ زوہیب اور المیرا ارشد نے علیگڑھ انسٹیٹیوٹ ہی نہیں بلکہ علیگڑھ کے تعلیمی فلسفے کا وقار بلند کیا ہے۔” ادارے نے دونوں طالبات کے لیے خصوصی تعریفی اسناد اور ایوارڈز کا اعلان کیا۔
شعبہ DIIL اور گائیڈنس سینٹر کی کوآرڈینیٹرز ارشاد احمد اور مس وسیمہ شمیم نے طالبات کو مبارکباد دیتے ہوئے کہا کہ “یہ کامیابی ادارے کے منظم تعلیمی وژن اور رہنمائی کا نتیجہ ہے۔”
مزید برآں، AIT کی پاکستان کوئز ٹیم "B” جس میں تاجور مجاہد اور انزیلا سحر خان (بائیومیڈیکل ٹیکنالوجی) شامل تھیں، نے بھی بہترین کارکردگی کا مظاہرہ کیا۔
اختتامی تقریب میں کامیاب ٹیموں میں انعامات اور اسناد تقسیم کی گئیں۔
