لاہور – لاہور کے علاقے مصطفی آباد میں سسرالیوں کی جانب سے بہو پر تشدد کا افسوسناک واقعہ پیش آیا ہے، پولیس نے ایک ملزم کو گرفتار کرلیا ہے۔
پولیس کے مطابق متاثرہ خاتون رقیہ امجد پر اس کے سسرالیوں دانش، امین اور ماہم وغیرہ نے تشدد کیا۔ اطلاع ملتے ہی مصطفی آباد پولیس موقع پر پہنچی اور واقعے کی تحقیقات شروع کر دی۔
ایس پی کینٹ کیپٹن (ر) قاضی علی رضا کے مطابق متاثرہ خاتون کی مدعیت میں نامزد ملزمان کے خلاف مقدمہ درج کرلیا گیا ہے جبکہ ایک ملزم کو گرفتار کیا جاچکا ہے۔ باقی ملزمان کی گرفتاری کے لیے خصوصی ٹیم تشکیل دے دی گئی ہے۔
ایس پی کینٹ کا کہنا تھا کہ ملوث افراد کو جلد گرفتار کیا جائے گا، قانون ہاتھ میں لینے والوں سے سختی سے نمٹا جائے گا۔ ان کا مزید کہنا تھا کہ خواتین پر تشدد کرنے والے کسی رعایت کے مستحق نہیں۔
