پاکستانی گلوکار فلک شبیر نے میوزیکل ریئلٹی شو پاکستان آئیڈل کے ججز اور امیدواروں کی حمایت میں بڑا قدم اٹھاتے ہوئے انہیں اپنے گانے بغیر اجازت گانے کی اجازت دے دی۔
فلک شبیر کا یہ اعلان اس وقت سامنے آیا جب معروف گلوکار سجاد علی نے مالی معاملات طے نہ ہونے کی وجہ سے اسی شو میں اپنے گانوں کے استعمال پر پابندی عائد کر دی تھی۔ سجاد علی نے ایک پریس کانفرنس میں کہا تھا کہ امیدوار اگر ان کے گانے گائیں تو جیت سکتے ہیں، مگر وہ انہیں سرکاری طور پر گانے کی اجازت نہیں دے رہے کیونکہ معاہدہ طے نہیں پایا۔
سجاد علی کے اس مؤقف پر سوشل میڈیا پر بحث چھڑ گئی اور کئی افراد نے ان پر تنقید کرتے ہوئے کہا کہ موسیقی کی دنیا میں نئے فنکاروں کو موقع دینا چاہیے۔
اسی پس منظر میں فلک شبیر نے ایک مختلف مؤقف اختیار کیا۔ اپنے بیان میں انہوں نے کہا کہ ان کا مقصد نئے اور باصلاحیت فنکاروں کی حوصلہ افزائی کرنا ہے تاکہ وہ آزادانہ طور پر اپنی صلاحیتیں دکھا سکیں۔
فلک شبیر نے کہا، “موسیقی سب کے لیے ہے۔ اگر میرے گانے نئے گلوکاروں کی ترقی میں مددگار ثابت ہوں اور وہ پاکستان کا نام روشن کریں، تو وہ انہیں بلا جھجک گا سکتے ہیں۔”
فلک شبیر کے اس مثبت قدم کو مداحوں اور میوزک انڈسٹری کے افراد کی جانب سے خوب سراہا جا رہا ہے، جنہوں نے انہیں نئی آوازوں کی حوصلہ افزائی اور موسیقی میں اتحاد کو فروغ دینے پر خراجِ تحسین پیش کیا۔
