اسلام آباد: تھانہ ترنول اور ہومی سائیڈ یونٹ پولیس نے حقیقی والد کو فائرنگ کرکے قتل کرنے والے بیٹے سمیت دو ملزمان کو گرفتار کرلیا۔
پولیس کے مطابق گرفتار ملزمان میں سلیمان خان عرف جابر خان اور عبداللہ شامل ہیں، جنہوں نے تھانہ ترنول کی حدود میں حیات خان کو فائرنگ کرکے قتل کیا۔
پولیس ٹیم نے جدید ٹیکنالوجی اور سائنسی طریقۂ تفتیش کے ذریعے دونوں ملزمان کو گرفتار کرلیا، جبکہ ان کے قبضے سے آلۂ قتل پستول بھی برآمد کرلیا گیا۔
ڈی آئی جی اسلام آباد محمد جواد طارق کا کہنا ہے کہ ملزمان کے خلاف ٹھوس شواہد کی بنیاد پر چالان تیار کیا جا رہا ہے اور انہیں عدالت سے قرار واقعی سزا دلوائی جائے گی۔
