لاہور: صدر ڈویژن پولیس نے گھروں میں وارداتیں کرنے والے 2 پولیس اہلکاروں سمیت 5 ملزمان کو گرفتار کرلیا، جن میں ہنی ٹریپ میں ملوث 3 افراد بھی شامل ہیں۔
ایس پی صدر رانا حسین طاہر نے پریس کانفرنس میں بتایا کہ چوہنگ پولیس نے کارروائی کرتے ہوئے دو پولیس اہلکاروں، علی حیدر اور برطرف اہلکار راحت علی سمیت ایک ساتھی کو گرفتار کیا۔ ملزمان گھروں میں ڈکیتی اور چوری کی وارداتوں میں ملوث تھے۔ پولیس نے ان کے قبضے سے کروڑوں روپے مالیت کے زیورات، نقدی اور اسلحہ برآمد کیا۔
ادھر نواب ٹاؤن پولیس نے ہنی ٹریپ کے ذریعے شہریوں کو لوٹنے والے گروہ کے تین ارکان — رضا، خرم اور سلیمان — کو گرفتار کرلیا۔ پولیس کے مطابق ملزمان آن لائن خریداری پر ڈسکاؤنٹ دینے کا جھانسہ دے کر شہریوں کو بلاتے، برہنہ ویڈیوز بناتے اور تشدد کے بعد قیمتی سامان اور نقدی چھین لیتے تھے۔
پولیس نے دونوں گروہوں کے دیگر ممکنہ ساتھیوں کی گرفتاری کے لیے مزید تحقیقات شروع کر دی ہیں۔
