کراچی: ایف آئی اے کے انسدادِ انسانی اسمگلنگ سرکل نے کارروائی کرتے ہوئے ایک شخص کو گرفتار کر لیا جو شہری کو جعلی آسٹریلوی ورک ویزا لگا کر دینے کے نام پر لاکھوں روپے ہتھیا چکا تھا۔
ترجمان ایف آئی اے کے مطابق گرفتار ملزم کی شناخت کاشف رضا کے نام سے ہوئی ہے جو گلشنِ اقبال کراچی کا رہائشی ہے۔ ملزم اوورسیز ایمپلائنمنٹ پروموٹر کے طور پر رجسٹرڈ نہیں تھا لیکن اس کے باوجود اس نے شہری سے 8 لاکھ روپے ایڈوانس وصول کیے اور مجموعی طور پر 28 لاکھ روپے میں ویزے کا جعلی معاہدہ کیا۔
ایف آئی اے کے مطابق ملزم نے شہری کو جعلی ویزا فراہم کیا جس پر اسے گرفتار کیا گیا۔ ملزم کے خلاف مقدمہ درج کر کے مزید تفتیش شروع کر دی گئی ہے تاکہ دیگر ممکنہ متاثرین اور معاونین کا سراغ لگایا جا سکے۔
