راولپنڈی: بلیک میلنگ، زیادتی اور قتل کے دل خراش واقعے میں پولیس نے مقتولہ کے جسم سے حاصل کیے گئے ڈی این اے نمونے فرانزک لیب لاہور میں جمع کروا دیے ہیں۔
پولیس ذرائع کے مطابق گرفتار تین ملزمان عدیل، موسیٰ اور جواد کے ڈی این اے نمونے آئندہ ہفتے تک فرانزک لیب میں جمع کروا دیے جائیں گے۔ پولیس نے ملزمان کا سات روزہ جسمانی ریمانڈ بھی حاصل کرلیا ہے۔
تفتیش کے مطابق ملزم عدیل پیشے کے اعتبار سے سنار جبکہ جواد ایک پرائیویٹ بینک کا ملازم ہے۔ مقدمہ مقتولہ کے شوہر کی مدعیت میں تھانہ گوجر خان میں قتل اور زیادتی کی دفعات کے تحت درج کیا گیا، جس میں الزام عائد کیا گیا ہے کہ ملزمان نے خاتون کے 40 تولے سونا ہتھیانے کے بعد اس کے نام پر بینک سے قرض حاصل کیا اور اسے متعدد بار زیادتی کا نشانہ بناکر زہریلی گولیاں کھلا دیں۔
گزشتہ روز گوجر خان کے علاقے بابا رحیم شاہ میں یہ انسانیت سوز واقعہ منظر عام پر آیا، جہاں خاتون کی پراسرار موت کے بعد موبائل فون سے ملنے والی ویڈیوز نے انکشاف کیا کہ ملزمان نے مالی لین دین کے جھانسے میں لا کر خاتون کو بلیک میل کیا اور زیادتی کا نشانہ بنایا۔
مقتولہ کے شوہر شیراز آفتاب کے مطابق اہلیہ نے نزع کی حالت میں بتایا کہ جیولرز مالک عدیل اور اس کے ساتھیوں نے کروڑوں روپے مالیت کے زیورات اور نقدی ہتھیا کر اسے سود اور بھتہ کے نام پر بلیک میل کیا، اور مسلسل جنسی زیادتی کا نشانہ بناتے رہے۔
پولیس کا کہنا ہے کہ مقدمہ درج کرکے تفتیش شروع کردی گئی ہے، گرفتار ملزمان سے مزید پوچھ گچھ جاری ہے جبکہ فرانزک رپورٹ کے بعد مزید انکشافات متوقع ہیں۔
