کراچی: شہر کے مختلف علاقوں میں پولیس اور اسٹریٹ کرمنلز کے درمیان مبینہ مقابلوں کے دوران پانچ ملزمان کو گرفتار کرلیا گیا، جن کے قبضے سے اسلحہ، نقدی اور مسروقہ سامان برآمد ہوا۔
تفصیلات کے مطابق میمن گوٹھ میں پولیس نے موٹر سائیکل سوار مشکوک افراد کو رکنے کا اشارہ کیا، جس پر ملزمان نے فائرنگ کردی۔ پولیس کی جوابی کارروائی میں ایک ملزم لالدین زخمی حالت میں گرفتار ہوا جبکہ اس کا ساتھی فرار ہوگیا۔ پولیس نے موقع سے اسلحہ اور نقد رقم برآمد کی۔
اسی طرح بھینس کالونی میں پولیس مقابلے کے بعد دو زخمی ملزمان حسیب اور نوید کو گرفتار کیا گیا۔
جیکسن پولیس کے مطابق ایک اور کارروائی میں ایک زخمی سمیت دو ملزمان محمد قاسم اور بادشاہ کو گرفتار کیا گیا۔ ان کے قبضے سے دو پستول، دو مسروقہ موٹر سائیکلیں اور موبائل فون برآمد ہوئے۔
پولیس کا کہنا ہے کہ گرفتار ملزمان مختلف وارداتوں میں ملوث تھے جبکہ مزید تفتیش جاری ہے۔
