راولپنڈی کے تھانہ آراے بازار پولیس نے جمعے کے روز کارروائی کرتے ہوئے ایک شخص کو اہلیہ پر تشدد کرنے اور گلا گھونٹ کر قتل کی کوشش کے الزام میں گرفتار کر لیا۔ ترجمان راولپنڈی پولیس کے مطابق مدعیہ نے بیان دیا کہ اس کے شوہر نے ساس اور سسر کے ساتھ مل کر اسے تشدد کا نشانہ بنایا اور گلے میں پھندا ڈال کر جان سے مارنے کی کوشش کی۔
مقدمے کے متن میں یہ بھی الزام عائد کیا گیا ہے کہ ساس اور سسر شوہر کی دوسری شادی کروانے کے لیے دباؤ ڈال رہے تھے، جس کے باعث گھریلو جھگڑا سنگین صورتحال اختیار کر گیا۔
ایس پی پوٹھوہار طلحہ ولی کا کہنا ہے کہ خواتین اور بچوں پر تشدد، ہراسمنٹ یا زیادتی کسی صورت برداشت نہیں کی جائے گی، اور ایسے واقعات میں ملوث افراد کے خلاف سخت کارروائی عمل میں لائی جائے گی۔
