ممبئی: بالی وڈ کے سینئر اداکار گووندا کو طبیعت اچانک خراب ہونے پر بے ہوشی کی حالت میں منگل اور بدھ کی درمیانی شب اسپتال منتقل کیا گیا۔
بھارتی میڈیا رپورٹس کے مطابق گووندا کو اپنے گھر میں اچانک چکر آنے اور بے ہوش ہونے کے بعد اہلِ خانہ نے فوری طور پر قریبی اسپتال پہنچایا۔
اداکار کے قریبی دوست اور قانونی مشیر للت بندال کے مطابق، ابتدا میں گھر پر ڈاکٹر سے مشورہ کرکے دوا دی گئی تھی، تاہم حالت بہتر نہ ہونے پر انہیں رات ایک بجے ایمرجنسی میں اسپتال لے جایا گیا۔
للت بندال نے مزید کہا کہ گووندا فی الحال ڈاکٹروں کی نگرانی میں ہیں اور ان کے مختلف ٹیسٹ مکمل کیے جا چکے ہیں، جن کے نتائج کا انتظار ہے۔
اداکار کے اہلِ خانہ کی جانب سے تاحال کوئی باضابطہ بیان جاری نہیں کیا گیا، تاہم ذرائع کے مطابق گووندا کی حالت خطرے سے باہر ہے۔
قابلِ ذکر بات یہ ہے کہ چند روز قبل ہی گووندا نے بریچ کینڈی اسپتال میں زیرِ علاج معروف اداکار دھرمیندر کی عیادت کی تھی۔
