راولپنڈی: انسدادِ دہشت گردی کی عدالت نے 26 نومبر کے احتجاج کیس میں علیمہ خان کے خلاف دسویں مرتبہ ناقابلِ ضمانت وارنٹ گرفتاری جاری کر دیا۔
کیس کی سماعت انسدادِ دہشت گردی عدالت کے جج امجد علی شاہ نے کی۔ سماعت کے دوران عدالت نے علیمہ خان کی اسلام آباد اور پنجاب میں موجود جائیدادوں کی تازہ تفصیلات طلب کر لیں، جبکہ بینک اکاؤنٹس منجمد نہ کرنے پر دو بینک مینیجرز کو شوکاز نوٹس بھی جاری کیے گئے۔
علیمہ خان آج بھی عدالت میں پیش نہ ہوئیں، تاہم مقدمے کے دیگر دس ملزمان نے حاضری لگا کر واپسی کی اجازت حاصل کر لی۔
عدالت نے علیمہ خان کو گرفتار کر کے 17 نومبر کو پیش کرنے کا حکم دیتے ہوئے سماعت ملتوی کر دی۔
اس سے قبل عدالت نو مرتبہ وارنٹ گرفتاری جاری کر چکی ہے اور آج بھی انہیں گرفتار کر کے پیش کرنے کا حکم دیا گیا تھا، جبکہ پانچ گواہان کو طلب کیا گیا تھا۔
وکیلِ صفائی فیصل ملک نے عدالت کو بتایا کہ علیمہ خان آج بھی پیش نہیں ہوں گی کیونکہ مقدمے میں شامل دہشت گردی کی دفعات کو چیلنج کیا جا چکا ہے، ان کے مطابق یہ کیس ان دفعات کے زمرے میں نہیں آتا۔
