فروری 4، 2026
ویب ڈیسک
اسلام آباد ہائیکورٹ نے سابق ڈی جی آئی ایس آئی فیض حمید کے بھائی نجف حمید کے خلاف فراڈ کیس میں ضمانت بحالی کی درخواست پر سماعت کی۔
عدالت نے درخواست پر سیکرٹری داخلہ اور متعلقہ فریقین کو نوٹس جاری کرتے ہوئے جواب طلب کر لیا۔ نجف حمید اپنے وکیل بیرسٹر راجہ قدیر جنجوعہ اور ایڈووکیٹ احد کھوکھر کے ہمراہ عدالت میں پیش ہوئے۔
وکلا نے عدالت سے ضمانت منسوخی کے فیصلے کو معطل کرنے کی استدعا کی۔ جسٹس راجہ انعام امین منہاس نے ریمارکس دیے کہ فریقین کے جوابات آنے کے بعد اس معاملے پر تحریری حکم نامہ جاری کیا جائے گا۔
نجف حمید نے ایف آئی اے کے مقدمے میں اسپیشل جج سینٹرل کی جانب سے 24 جنوری کو سنائے گئے ضمانت منسوخی کے فیصلے کو اسلام آباد ہائیکورٹ میں چیلنج کر رکھا ہے۔ کیس کی سماعت جسٹس راجہ انعام امین منہاس نے کی۔
