پنجاب کے ضلع علی پور میں ایک نجی اسکول کے مالک کا مکروہ کردار بے نقاب ہوگیا ہے، جو مبینہ طور پر طویل عرصے تک خواتین ٹیچرز اور طالبات کو بلیک میل کرکے جنسی استحصال کا نشانہ بناتا رہا۔
پولیس کے مطابق متاثرہ خاتون کے اہلخانہ کی مدعیت میں تھانہ سٹی علی پور میں مقدمہ درج کیا گیا ہے، جبکہ ملزم کی شناخت اسکول سربراہ ہدایت رضوی کے نام سے ہوئی ہے۔ ایف آئی آر کے مطابق ملزم نہ صرف خواتین کو خود زیادتی کا نشانہ بناتا رہا بلکہ بلیک میل کرکے انہیں دوسروں کے سامنے بھی پیش کرتا تھا۔
تحقیقات کے مطابق ملزم طویل عرصے تک ٹیچرز اور طالبات کی نازیبا ویڈیوز بناتا رہا، جن میں سے بعض ویڈیوز اس نے سوشل میڈیا پر بھی وائرل کیں۔ پولیس کا کہنا ہے کہ ویڈیوز سامنے آنے کے بعد مزید متاثرہ خواتین تک رسائی کی کوشش کی جارہی ہے۔
پولیس ترجمان نے بتایا کہ اب تک سامنے آنے والی ویڈیوز میں کم از کم چار خواتین کا جنسی استحصال ثابت ہوا ہے۔ ملزم کی گرفتاری کے لیے چھاپے مارے جارہے ہیں جبکہ پولیس کا کہنا ہے کہ وہ ہر پہلو سے تفتیش کر رہی ہے۔
