ملتان: ایڈیشنل ڈسٹرکٹ اینڈ سیشن کورٹ نے ثانیہ زہرا قتل کیس کا فیصلہ سناتے ہوئے مقتولہ کے شوہر علی رضا کو سزائے موت کا حکم سنا دیا۔
عدالتی ریکارڈ کے مطابق اس مقدمے میں شوہر علی رضا، ساس عزرا پروین، دیور علی حیدر سمیت 6 ملزمان کو نامزد کیا گیا تھا۔
فیصلہ سناتے ہوئے عدالت نے علی رضا کو دفعہ 302 کے تحت سزائے موت جبکہ عزرا پروین اور علی حیدر کو عمر قید اور 5 لاکھ روپے جرمانے کی سزا سنائی۔ شواہد کی عدم دستیابی پر تین ملزمان کو بری کر دیا گیا۔
فیصلے کے بعد میڈیا سے گفتگو میں مقتولہ کے والد اسد عباس شاہ نے کہا کہ انہوں نے اپنی بیٹی کے لیے اکیلے قانونی جنگ لڑی۔ ان کا کہنا تھا کہ “آج انصاف کی جیت ہوئی ہے، اب کوئی بھی کسی کی بیٹی کی جان لینے کی ہمت نہیں کرے گا۔”
واضح رہے کہ ثانیہ زہرا کو گزشتہ سال اس کے شوہر نے قتل کیا تھا۔
