حکومتِ پنجاب کا ماحولیاتی بہتری اور شہری تفریح کے فروغ کے لیے بڑا قدم
پنجاب حکومت نے لاہور میں ریلوے ٹریک کے ساتھ ساتھ 40 کلومیٹر طویل گرین زون بنانے کے منصوبے کی منظوری دے دی ہے، جس کا مقصد فضائی آلودگی میں کمی اور شہریوں کے لیے مزید تفریحی مقامات فراہم کرنا ہے۔
پارکس اینڈ ہارٹیکلچر اتھارٹی (PHA) کے مطابق جلد ہی اس منصوبے کے ٹینڈرز جاری کیے جائیں گے۔ پی ایچ اے کے مینیجنگ ڈائریکٹر راجہ منصور احمد کا کہنا ہے کہ یہ منصوبہ ڈیڑھ سال میں مکمل کر لیا جائے گا۔
منصوبے کے تحت ریلوے کوریڈور کے قریب 30 نئے پارکس قائم کیے جائیں گے جن کا رقبہ 3 کنال سے 80 کنال تک ہوگا۔
حکام کے مطابق پارکس میں جدید سہولیات فراہم کی جائیں گی جن میں اسپورٹس ایریاز، فٹنس زونز، جاگنگ ٹریکس اور معیاری تفریحی سرگرمیوں کے لیے خصوصی مقامات شامل ہوں گے۔
حکومت کا یہ اقدام شہر میں ہریالی کے فروغ، ماحولیاتی بہتری اور شہریوں کے لیے صحت مند طرزِ زندگی کو یقینی بنانے کی کوششوں کا حصہ ہے۔
