کراچی: سچل پولیس نے ڈکیتی کے دوران مزاحمت پر فائرنگ کرکے کم سن بچے کو قتل کرنے والے مرکزی ملزم کو گرفتار کر لیا ہے۔
ایس ایچ او سچل امین کھوسہ کے مطابق یہ کارروائی دو نومبر کو سپرہائی وے سچل موڑ براق پمپ کے قریب پیش آنے والے واقعے کے سلسلے میں کی گئی، جہاں گاؤں جانے والے مسافروں کو دو ملزمان نے لوٹنے کی کوشش کی تھی۔
مسافروں کی جانب سے مزاحمت پر ملزمان نے اندھا دھند فائرنگ کی، جس کے نتیجے میں 12 سالہ حسنین ولد محمد قاسم جاں بحق ہوگیا جبکہ اس کا ماموں علی اکبر زخمی ہوا تھا۔ فائرنگ کے بعد ملزمان موقع سے فرار ہوگئے تھے۔
پولیس نے جدید اور تکنیکی بنیادوں پر تفتیش کرتے ہوئے واردات میں ملوث مرکزی ملزم محمد یاسین ولد لعل خان کو گرفتار کرلیا، جبکہ اس کے قبضے سے واردات میں استعمال ہونے والا غیر قانونی اسلحہ بھی برآمد کرلیا گیا۔
پولیس کے مطابق گرفتار ملزم نے دورانِ تفتیش نہ صرف اس واردات بلکہ دیگر متعدد سنگین جرائم میں ملوث ہونے کا اعتراف بھی کیا ہے۔ مزید تفتیش جاری ہے۔
