ایشز 2025 کا آغاز پرتھ میں ایک دھماکے دار دن کے ساتھ ہوا جہاں پہلے ہی دن 19 وکٹیں گر گئیں اور دونوں ٹیموں کی بیٹنگ لائنیں یکے بعد دیگرے زمین بوس ہوتی رہیں۔ انگلینڈ کی ٹیم پہلی اننگز میں صرف 172 رنز پر سمٹ گئی۔ ہیری بروک نے ذمہ دارانہ 52 رنز بنائے جبکہ اولی پوپ 46 رنز تک گئے، مگر باقی بیٹنگ لائن مچل اسٹارک اور آسٹریلوی پیس اٹیک کے سامنے ٹک نہ سکی۔
جواب میں آسٹریلیا کا آغاز مزید تباہ کن رہا۔ جوفرا آرچر نے پہلے ہی اوورز میں ویترالڈ اور لبوشین کی وکٹیں لے کر آسٹریلوی اننگز کی کمر توڑ دی۔ اس کے بعد کارس اور بین اسٹوکس نے شاندار باؤلنگ کرتے ہوئے آسٹریلیا کو صرف 123 پر نو آؤٹ کر دیا۔ آسٹریلیا اب بھی 49 رنز کے خسارے میں ہے۔
الیکس کیری کی 26 رنز کی اننگز اور کیمرون گرین کے 24 رنز کے علاوہ کوئی بھی بیٹر مزاحمت نہ کر سکا۔ انگلینڈ کے باؤلرز نے آخری سیشن پوری طرح اپنے نام کیا اور آسٹریلیا کو دیوار سے لگا دیا۔ میچ کا پہلا دن مکمل طور پر باؤلرز کے نام رہا، اور اب دوسرا دن فیصلہ کن ثابت ہو سکتا ہے۔
