اسلام آباد: ایف آئی اے امیگریشن نے اسلام آباد انٹرنیشنل ایئرپورٹ پر عمرہ ویزے کی آڑ میں یورپ جانے کی کوشش کرنے والے مسافر کو آف لوڈ کرکے حراست میں لے لیا۔
حکام کے مطابق محمد عثمان نامی مسافر کو فلائٹ PK-713 کی امیگریشن کلیئرنس کے دوران چیک کیا گیا، جس سے معلوم ہوا کہ وہ مختلف ایجنٹوں کے ساتھ رابطے میں تھا اور اسے رواں سال اٹلی سے غیر قانونی ہجرت کے باعث ڈیپورٹ کیا جا چکا ہے۔
مزید جانچ پڑتال میں مسافر کے موبائل فون سے ٹیمپرڈ شدہ ریزیڈنٹ کارڈ برآمد ہوا، جس کی تاریخِ تنسیخ میں ردوبدل کیا گیا تھا۔ ملزم کا ارادہ جعلی دستاویزات کے ذریعے سعودی عرب سے یورپ جانے کا تھا۔
ایف آئی اے نے مسافر کو گرفتار کرکے مزید قانونی کارروائی کے لیے کمپوزٹ سرکل گوجرانوالہ کے حوالے کر دیا ہے۔
