کراچی: بوٹ بیسن پولیس نے شیریں جناح کالونی میں جھگڑے کے دوران تیز دھار آلے کے وار سے حافظِ قرآن نوجوان کے قتل کے الزام میں دو سگے بھائیوں سمیت چار ملزمان کو گرفتار کرلیا۔
پولیس کے مطابق گرفتار ملزمان کی شناخت عبدالرحمٰن، عبدالشکور، سجاد اور شاہد کے ناموں سے ہوئی ہے، جن میں عبدالرحمٰن اور عبدالشکور آپس میں سگے بھائی ہیں۔ واقعہ 18 نومبر کو اس وقت پیش آیا جب بچوں کی معمولی لڑائی بڑوں کے مابین جھگڑے میں تبدیل ہوگئی، جس دوران حماد نامی نوجوان تیز دھار آلے کے وار سے شدید زخمی ہوگیا۔
شدید زخمی نوجوان کو فوری طور پر اسپتال منتقل کیا گیا جہاں وہ دورانِ علاج زخموں کی تاب نہ لاتے ہوئے چل بسا۔ پولیس نے مقدمہ درج کرکے تفتیش شروع کی اور کارروائی کے دوران چاروں ملزمان کو گرفتار کرکے ان کے قبضے سے آلۂ قتل بھی برآمد کرلیا۔
پولیس کے مطابق گوہر نامی ایک ملزم تاحال مفرور ہے، جس کی گرفتاری کے لیے کوششیں جاری ہیں اور توقع ہے کہ اسے بھی جلد گرفتار کرلیا جائے گا۔
