دبئی ایئر شو میں بھارتی تیجس طیارہ گرنے کے بعد بھارت کو ایک اور بڑا دھچکا لگا ہے، کیونکہ غیر ملکی میڈیا رپورٹس کے مطابق آرمینیا نے طیارے کی خریداری کا فیصلہ واپس لے لیا ہے۔
رپورٹس کے مطابق آرمینیا 1.2 ارب ڈالر مالیت کے 12 تیجس طیارے خریدنے کا ارادہ رکھتا تھا، تاہم دبئی ایئر شو میں پیش آئے حادثے کے فوراً بعد اس نے معاہدہ منسوخ کرنے کا فیصلہ کیا۔
چند روز قبل دبئی ایئر شو میں تیجس طیارہ کرتب دکھاتے ہوئے تیزی سے نیچے آیا اور رن وے کے قریب زمین سے ٹکرا کر تباہ ہوگیا۔ عینی شاہدین کے مطابق ٹکر کے فوراً بعد شعلے بلند ہوگئے اور پائلٹ باہر نکلنے میں کامیاب نہ ہو سکا۔
بھارتی فضائیہ نے حادثے میں ونگ کمانڈر وکرم سنگھ کی ہلاکت کی تصدیق کرتے ہوئے کہا کہ حادثے کی تحقیقات جاری ہیں۔
یہ 2015 میں بھارتی فضائیہ میں شامل ہونے کے بعد تیجس طیاروں کا دوسرا بڑا حادثہ ہے۔ اس سے قبل ایک تیجس تربیتی پرواز کے دوران ہندوستان کے صوبے راجستھان میں گر کر تباہ ہوا تھا۔
دبئی حادثے کے بعد تیجس طیارہ بنانے والی کمپنی ہندوستان ایروناٹکس کے شیئرز میں 2.62 فیصد کی کمی ریکارڈ کی گئی۔
رپورٹس میں یہ دعویٰ بھی سامنے آیا ہے کہ تکنیکی خرابیوں کے باوجود طیارے کو ایئر شو میں شامل کیا گیا، جبکہ آئل لیک کی وجہ سے طیارہ پہلے ہی سوشل میڈیا پر بحث کا موضوع بنا ہوا تھا۔
