بھارت نے خاموشی کے ساتھ نیٹ فلکس سمیت بڑے او ٹی ٹی پلیٹ فارمز پر پاکستانی ڈراموں اور شوز کی دستیابی محدود کرنا شروع کردی ہے، جس کے نتیجے میں متعدد مقبول پاکستانی سیریز اچانک اسٹریمنگ سروسز سے غائب ہوگئی ہیں۔
انڈسٹری سے وابستہ ذرائع کے مطابق بھارتی حکام نے مختلف اسٹریمنگ کمپنیوں کو ہدایات جاری کی ہیں کہ پاکستان میں تیار کیا گیا ہر نوعیت کا مواد اپنی لائبریری سے ہٹا دیا جائے۔ ہدایات ملنے کے بعد نیٹ فلکس سمیت دیگر پلیٹ فارمز نے خاموشی سے پاکستانی پروڈکشنز کو سرچ نتائج اور تجویز کردہ فہرستوں سے ہٹانا شروع کردیا۔
نئے اقدام کا اندازہ اس وقت ہوا جب بھارتی صارفین نے شکایت کی کہ کئی مشہور پاکستانی ڈرامے اب نیٹ فلکس پر دستیاب نہیں رہے۔ سوشل میڈیا پر صارفین نے ناراضی کا اظہار کیا اور اسے ثقافتی تبادلے کے راستے بند کرنے کے مترادف قرار دیا۔
بھارتی حکام کی جانب سے اس فیصلے پر کوئی باضابطہ بیان جاری نہیں کیا گیا جبکہ اسٹریمنگ پلیٹ فارمز نے بھی کسی تبصرے سے گریز کیا ہے۔ تاہم میڈیا انڈسٹری کے مطابق یہ ہدایات تمام بڑی کمپنیوں پر یکساں طور پر لاگو کی گئی ہیں۔
یہ پابندی عارضی ہے یا مستقل، اس بارے میں وضاحت سامنے نہیں آئی۔ مگر ماہرین کا کہنا ہے کہ اس اقدام سے اُس وقت میں مزید رکاوٹ پیدا ہوگی جب پاکستانی ڈراموں کی بھارت میں مقبولیت مسلسل بڑھ رہی تھی۔
