میامی: تھامس میولر کا کہنا ہے کہ لیونل میسی کے خلاف ان کی سابقہ کارکردگی ہفتے کو ہونے والے ایم ایل ایس کپ فائنل میں کوئی اہمیت نہیں رکھتی، جہاں وہ وینکوور وائٹ کیپس کی جانب سے انٹر میامی کا سامنا کریں گے۔
جرمن اسٹار میولر، جو اگست میں بائرن میونخ چھوڑ کر وینکوور میں شامل ہوئے، کلب اور ملکی سطح پر میسی کے خلاف عمدہ ریکارڈ رکھتے ہیں۔
اگرچہ میولر نے میسی کے خلاف 10 میں سے 7 مقابلوں میں کامیابی حاصل کی ہے، لیکن 36 سالہ کھلاڑی کا کہنا ہے کہ یہ سابقہ نتائج فلوریڈا میں ہونے والے نئے میچ پر اثرانداز نہیں ہوں گے۔
میولر نے کہا:
"میں ماضی کو دیکھتا ہوں تو اچھا محسوس ہوتا ہے، وہ سب کچھ ریکارڈ کا حصہ ہے اور ان میچز میں اپنی ٹیموں کے ساتھ شاندار تجربات ملے۔ لیکن ان سب کا ہفتے کے میچ سے کوئی تعلق نہیں۔ یہ ایک نیا مقابلہ ہے۔”
انہوں نے مزید کہا کہ ماضی کی کامیابیاں اعتماد دیتی ہیں، مگر وہ اپنی موجودہ تیاری پر زیادہ انحصار کرتے ہیں۔
"ہاں، یہ احساس اچھا ہوتا ہے کہ آپ کسی کو پہلے شکست دے چکے ہیں، لیکن اصل اعتماد آپ کی ٹیم اور آپ کی موجودہ فارم سے آتا ہے۔”
میولر نے اس بات کی اہمیت بھی کم کی کہ وینکوور نے اسی سال کونکا کف چیمپئنز کپ کے سیمی فائنلز میں میامی کو گھریلو اور غیر ملکی دونوں میدانوں میں ہرا کر 5-1 مجموعی برتری حاصل کی تھی۔
انہوں نے کہا:
"ہم نے اس سیزن میں انٹر میامی کو دو بار ہرایا ہے، لیکن اس کا کیا مطلب؟ یہ صرف اچھا تاثر دیتا ہے، مگر فیصلہ تو ہفتے کو میدان میں ہونا ہے۔”
میولر کی میسی کے خلاف بڑی کامیابیوں میں 2014 کے ورلڈ کپ کا فائنل شامل ہے، جس میں جرمنی نے 0-1 سے ارجنٹی نا کو شکست دی، جبکہ 2020 کی چیمپئنز لیگ کے کوارٹر فائنل میں بائرن میونخ نے بارسلونا کو 2-8 سے مات دی تھی، جہاں میولر نے دو گول کیے اور میچ کے بہترین کھلاڑی رہے۔
وہ 2023 میں پیرس سینٹ جرمن کے خلاف چیمپئنز لیگ کے دوسرے لیگ کے 0-2 کے میچ میں بھی شامل تھے، جو یورپ میں میسی کا آخری مقابلہ ثابت ہوا۔
