کراچی: علیگڑھ انسٹیٹیوٹ آف ٹیکنالوجی (AIT) نے نئے تعلیمی سال کا آغاز فرسٹ ایئر طلبہ کے لیے “اسٹوڈنٹ آف دی منتھ” پروگرام متعارف کروا کر کر دیا ہے۔ اس پروگرام کے تحت ہر ڈیپارٹمنٹ سے ایک طالب علم کو ماہانہ بنیاد پر بہترین کارکردگی پر منتخب کیا جائے گا۔
انتظامیہ کے مطابق انتخاب کارکردگی، حاضری، رویے اور نظم و ضبط کو مدِنظر رکھتے ہوئے کیا جائے گا۔ ہر ڈیپارٹمنٹ کے سربراہ اس عمل کی نگرانی کریں گے تاکہ شفافیت برقرار رہے۔
پروگرام کی خاص بات یہ ہے کہ جو طالب علم تین ماہ مسلسل یہ اعزاز حاصل کرے گا، اسے خصوصی کیش پرائز دیا جائے گا۔ اس کا مقصد طلبہ میں صحت مند مقابلہ اور تعلیمی دلچسپی بڑھانا ہے۔
پہلی تقریب سے خطاب کرتے ہوئے پرنسپل شاہد جمیل نے کہا کہ یہ اسکیم طلبہ کی محنت کو سراہنے اور انہیں مزید بہتر کارکردگی کی ترغیب دینے کے لیے شروع کی گئی ہے۔
کنوینئر سید محمد محسن کاظم نے اس اقدام کو طلبہ کی شخصیت، اخلاق، نظم و ضبط اور عملی صلاحیتوں کی ترقی کے لیے اہم قدم قرار دیا۔
پروگرام میں آرٹیفیشل انٹیلیجنس، سافٹ ویئر، CIT، مکینیکل، میکاٹرانکس، کیمیکل، سول، آرکیٹیکچر، بائیو میڈیکل، الیکٹرانکس اور الیکٹریکل سمیت تمام ڈیپارٹمنٹس شامل ہیں، جس سے تمام طلبہ کے لیے برابر مواقع فراہم ہوں گے۔
