کراچی: ڈسٹرکٹ ساؤتھ پولیس نے ڈیفنس فیز 7 میں بروقت کارروائی کرتے ہوئے پنجاب سے تعلق رکھنے والے بدنامِ زمانہ "کرولا گینگ” کے پانچ ملزمان کو پولیس مقابلے کے بعد گرفتار کر لیا۔
پولیس کے مطابق ملزمان نے گھیراؤ کے دوران فرار کی کوشش کی اور پولیس پارٹی پر اندھا دھند فائرنگ بھی کی، تاہم مؤثر حکمتِ عملی کے تحت تمام ملزمان کو بغیر کسی جانی نقصان کے گرفتار کر لیا گیا۔
گرفتار افراد کی شناخت عرفان، بلال، عابد، شاہد اور وقاص کے نام سے ہوئی ہے۔ پولیس کے مطابق یہ گروہ دو روز قبل کراچی پہنچا تھا اور ائیرپورٹ، ریلوے اسٹیشن، بس اڈے اور رش والے علاقوں میں موبائل فون چھیننے اور لوٹ مار کی وارداتوں میں ملوث تھا۔
پولیس نے ملزمان سے اسلحہ، موبائل فونز، لیپ ٹاپ اور وارداتوں میں استعمال ہونے والی سفید کرولا بھی برآمد کر لی۔ حکام کا کہنا ہے کہ یہ گروہ موبائل فون چھیننے کے بعد فوری طور پر آئی ایم ای آئی نمبر تبدیل کر کے انہیں مارکیٹ میں فروخت کرتا تھا۔
پولیس کے مطابق پنجاب کے مختلف شہروں میں بھی ان کے خلاف متعدد مقدمات درج ہیں جبکہ ملزمان کی نشاندہی پر مختلف وارداتوں کی سی سی ٹی وی فوٹیجز سامنے آ چکی ہیں۔
ایس ایس پی ساؤتھ نے بروقت کارروائی پر پولیس ٹیم کی تعریف کرتے ہوئے کہا کہ کراچی میں جرائم پیشہ عناصر کے لیے کوئی گنجائش نہیں۔ ملزمان سے مزید تفتیش جاری ہے اور ان کے ممکنہ ساتھیوں تک رسائی کی امید ظاہر کی گئی ہے۔
