بھارت میں پیش آنے والے افسوسناک واقعے میں چند کھلاڑیوں نے ٹیم میں شامل نہ کیے جانے پر اپنے کوچ کو تشدد کا نشانہ بنا ڈالا۔
بھارتی میڈیا کے مطابق پونڈیچیری کرکٹ ایسوسی ایشن (CAP) کے گراؤنڈ میں انڈر–19 ٹیم کے کوچ وینکٹار امن پر تین مقامی کھلاڑیوں نے مبینہ طور پر حملہ کیا، جس کے بعد ان کے خلاف اقدامِ قتل کا مقدمہ درج کر لیا گیا۔
رپورٹس میں کہا گیا ہے کہ ٹیم میں جگہ نہ ملنے پر تینوں کھلاڑیوں نے گراؤنڈ میں ہی کوچ پر دھاوا بول دیا۔ واقعے کے وقت کوچ کھلاڑیوں کو نیٹ پریکٹس کروا رہے تھے۔
تشدد کے نتیجے میں کوچ شدید زخمی ہوگئے، انہیں 20 ٹانکے لگے جبکہ ان کی پسلیاں بھی ٹوٹ گئیں۔
پولیس نے ملزمان کی گرفتاری کے لیے سرچ آپریشن کا آغاز کر دیا ہے۔
