کراچی : کراچی کے علاقے کورنگی 100 کوارٹر میں واٹر ٹینکر کی ٹکر سے 12 سالہ لڑکا جاں بحق ہوگیا۔
ریسکیو ذرائع کے مطابق واقعہ بنگالی پاڑہ میں پیش آیا، جہاں فرحان نامی بچہ موقع پر ہی دم توڑ گیا۔
پولیس کے مطابق حادثے کے فوراً بعد ٹینکر ڈرائیور فرار ہونے کی کوشش کر رہا تھا، تاہم علاقہ مکینوں نے ٹینکر کو روک لیا۔ مشتعل افراد نے گاڑی کو آگ لگانے کی بھی کوشش کی، لیکن پولیس نے صورت حال پر قابو پا لیا۔
ڈرائیور کو حراست میں لے کر ٹینکر کو قبضے میں لے لیا گیا ہے اور قانونی کارروائی شروع کر دی گئی ہے۔
دوسری جانب ڈرائیور نے اپنے بیان میں کہا کہ بچہ سائیکل پر تھا اور توازن بگڑنے کے بعد گر کر ٹینکر کے پچھلے ٹائر کے نیچے آ گیا۔ اس کا کہنا تھا کہ حادثہ ٹینکر کی براہِ راست ٹکر سے نہیں ہوا، جبکہ مارکیٹ میں رش کے باعث گاڑی کی رفتار بھی کم تھی۔ ڈرائیور کا کہنا تھا، “غلطی کسی کی بھی ہو، لوگ ہمیشہ بڑی گاڑی والے کو ہی ذمہ دار سمجھتے ہیں۔”
ریسکیو حکام کے مطابق رواں سال کراچی میں مختلف حادثات میں 807 افراد جان کی بازی ہار چکے ہیں، جن میں سے 245 اموات بس، ٹینکر اور ٹرک جیسے ہیوی وہیکلز سے متعلق حادثات کی ہیں۔
