کراچی: اورنگی ٹاؤن میں کرایہ کے تنازع پر ایک خاتون کو قتل کرنے کے الزام میں پولیس نے میاں بیوی کو گرفتار کر لیا۔
تفتیشی حکام کے مطابق حوا گوٹھ کے قریب جھاڑیوں سے ملنے والی لاش کی شناخت اسما زوجہ منصور کے نام سے ہوئی، جو اپنے شوہر کے ہمراہ اورنگی ساڑھے 11 میں کرائے کے مکان میں رہائش پذیر تھی۔
حکام کا کہنا ہے کہ مکان دو پورشنز پر مشتمل تھا، جبکہ دوسرے پورشن میں ایک الگ خاندان مقیم تھا۔ مالک مکان نے کرایہ وصول کرنے کی ذمہ داری اسما کو سونپ رکھی تھی۔ ملزمان گزشتہ تین سے چار ماہ سے کرایہ ادا نہیں کر رہے تھے۔
4 دسمبر کو اسما کرایہ وصول کرنے کے لیے گئی تو تلخ کلامی کے دوران ملزمان نے مبینہ طور پر اسے دھکا دیا، جس کے نتیجے میں وہ گر کر موقع پر ہی جاں بحق ہو گئی۔ بعد ازاں ملزمان نے لاش کو بوری میں بند کیا اور موٹر سائیکل پر لے جا کر حوا گوٹھ کے قریب پھینک دی، پھر فرار ہو گئے۔
تفتیشی حکام کے مطابق مقتولہ کی گمشدگی کی رپورٹ پہلے ہی درج کرائی جا چکی تھی۔ دورانِ تفتیش شواہد کی بنیاد پر ملزمان کو گرفتار کیا گیا۔ واقعے کے وقت مقتولہ کا شوہر ڈیوٹی پر موجود نہیں تھا۔
پولیس کے مطابق گرفتار ملزمان کی شناخت کشور اور عدنان کے نام سے ہوئی ہے۔ لاش کو قانونی کارروائی کے لیے اسپتال منتقل کر دیا گیا ہے، جبکہ مزید تفتیش جاری ہے۔
