اسلام آباد: بھارت کے خلاف تاریخی کامیابی کے بعد اے سی سی مینز انڈر 19 ایشیا کپ 2025 جیتنے والی پاکستان انڈر 19 کرکٹ ٹیم کو وزیراعظم شہباز شریف کی جانب سے شاندار پذیرائی ملی، جبکہ ہر کھلاڑی کے لیے ایک کروڑ روپے نقد انعام کا اعلان بھی کیا گیا۔
نوجوان گرین شرٹس نے فائنل میں 348 رنز کے بڑے ہدف کا کامیابی سے دفاع کرتے ہوئے بھارت کو محض 156 رنز پر 26.2 اوورز میں آؤٹ کر دیا اور 191 رنز سے زبردست فتح اپنے نام کی۔
پیر کے روز وزیراعظم ہاؤس میں منعقدہ ظہرانے میں وزیراعظم شہباز شریف نے کھلاڑیوں اور ٹیم مینجمنٹ کو مبارکباد دی۔ اس موقع پر چیئرمین پاکستان کرکٹ بورڈ محسن نقوی اور متعدد وفاقی وزرا بھی موجود تھے۔
سابق قومی کپتان اور پاکستان انڈر 19 ٹیم کے مینٹور سرفراز احمد نے وزیراعظم کے اعلان کی تصدیق کرتے ہوئے کہا کہ یہ نوجوان کھلاڑی مستقبل میں ملک کا نام روشن کریں گے۔ انہوں نے فائنل میں نمایاں کارکردگی دکھانے والے کھلاڑیوں کو بھی سراہا۔
سرفراز احمد نے احمد حسین کی 72 گیندوں پر 56 رنز کی جرات مندانہ اننگز اور ثمیر منہاس کی شاندار 172 رنز کی باری کو خاص طور پر اجاگر کیا، جس میں 17 چوکے اور 9 چھکے شامل تھے۔
ہیڈ کوچ شاہد انور نے ٹیم کی تیاریوں پر روشنی ڈالتے ہوئے بتایا کہ 17 جون سے شروع ہونے والے ٹیلنٹ ہنٹ میں 70 کھلاڑیوں نے حصہ لیا، جنہیں چار میچز میں اپنی صلاحیت دکھانے کا موقع دیا گیا۔ کراچی میں دس روزہ کیمپ کے دوران سابق کرکٹرز کی رہنمائی نے ٹیم کو ایشیا کپ جیتنے کے قابل بنایا۔
