اسلام آباد: اسلام آباد کے علاقے کھنہ پل میں نوکری کا جھانسہ دے کر بے روزگار افراد سے لاکھوں روپے ہتھیانے کا معاملہ سامنے آ گیا ہے۔
ایف آئی آر کے مطابق ملزمان نے اخبارات میں ملازمتوں کے اشتہارات شائع کر کے سادہ لوح امیدواروں کو اسلام آباد بلایا، جہاں کھنہ پل کے قریب واقع MARS BPO کے دفتر میں ان کے انٹرویوز لیے گئے۔
مقدمے کے متن کے مطابق امیدواروں سے ٹریننگ کے نام پر فی کس 6 ہزار روپے وصول کیے گئے، جبکہ ٹریننگ مکمل ہونے کے بعد نوکری کی گارنٹی کے طور پر فی کس 14 لاکھ روپے طلب کیے گئے۔
مردان سے تعلق رکھنے والے درجنوں نوجوان اس مبینہ فراڈ کا شکار ہوئے، جن سے مجموعی طور پر 42 لاکھ روپے وصول کیے گئے، تاہم کسی کو ملازمت فراہم نہیں کی گئی۔
متاثرین کے مطابق رقم کی واپسی کا مطالبہ کرنے پر انہیں مبینہ طور پر تشدد اور جان سے مارنے کی دھمکیاں دی گئیں۔
تھانہ کھنہ پولیس نے مقدمہ درج کر کے تفتیش شروع کر دی ہے، تاہم تاحال کسی ملزم کی گرفتاری عمل میں نہیں آ سکی۔ ایف آئی آر میں دعویٰ کیا گیا ہے کہ Tains نامی کمپنی سے وابستہ افراد سیکڑوں لوگوں کو نوکری کے نام پر لوٹنے میں ملوث ہیں۔
