ڈیرہ اسماعیل خان میں کسٹمز انفورسمنٹ حکام نے اسمگلنگ کے خلاف کارروائیوں کے دوران مجموعی طور پر 51 کروڑ 80 لاکھ روپے مالیت کا اسمگل شدہ سامان ضبط کر لیا۔
حکام کے مطابق کسٹمز انفورسمنٹ ڈی آئی خان نے کلیکٹریٹ آف کسٹمز انفورسمنٹ پشاور کے تحت کارروائی کرتے ہوئے دو بیڈفورڈ ٹرکوں اور ایک ٹویوٹا آلٹس جی ایل آئی کار کو تحویل میں لیا۔ گاڑیوں سے مختلف برانڈز کے اسمگل شدہ ٹائرز، ادویات اور سگریٹس برآمد کیے گئے۔ ضبط شدہ سامان اور گاڑیوں کی مجموعی مالیت 48 کروڑ 80 لاکھ روپے بتائی گئی ہے۔
علاوہ ازیں، ایک الگ کارروائی میں مختلف مسافر بسوں سے سگریٹ پیپر، سگریٹس، ٹیفلون راڈز اور دیگر متفرق اسمگل شدہ اشیا برآمد کی گئیں، جن کی مالیت تقریباً 3 کروڑ روپے بتائی گئی ہے۔
حکام کے مطابق دونوں کارروائیوں میں ضبط کیے گئے سامان اور استعمال ہونے والی گاڑیوں کی مجموعی مالیت 51 کروڑ 80 لاکھ روپے بنتی ہے۔
فیڈرل بورڈ آف ریونیو (ایف بی آر) نے اسمگلنگ کے خلاف مؤثر کارروائیاں جاری رکھنے، قانونی تجارت کے تحفظ اور قومی معیشت کے استحکام کے عزم کا اعادہ کیا ہے۔
