کراچی: وزیراعلیٰ سندھ سید مراد علی شاہ نے سانحہ گل پلازہ میں جاں بحق ہونے والوں کے لواحقین کو فی کس ایک کروڑ روپے معاوضہ دینے کا اعلان کیا ہے، جبکہ متاثرین کی مکمل بحالی کی یقین دہانی کرائی ہے۔
وزیراعلیٰ سندھ کے مطابق اب تک 15 لاشیں نکالی جا چکی ہیں، 22 افراد معمولی زخمی ہوئے جو گھروں کو جا چکے ہیں، جبکہ 65 افراد تاحال لاپتہ ہیں۔ مجموعی طور پر 80 افراد اس واقعے سے متاثر ہوئے۔
مراد علی شاہ نے بتایا کہ آگ دو روز قبل صبح سوا دس بجے کے قریب لگی، جس کی ممکنہ وجہ شارٹ سرکٹ ہو سکتی ہے، تاہم حتمی وجہ جاننے کے لیے فرانزک رپورٹ تیار کی جا رہی ہے۔
انہوں نے کہا کہ ریسکیو آپریشن میں کے ایم سی اور ریسکیو 1122 کے 200 فائر فائٹرز نے حصہ لیا، جبکہ نیوی اور سول ایوی ایشن اتھارٹی نے بھی مدد فراہم کی۔ عمارت کا تقریباً 40 فیصد حصہ منہدم ہو چکا ہے اور مزید گرنے کا خدشہ ہے۔
وزیراعلیٰ سندھ نے کہا کہ امدادی رقوم کی ادائیگی آج سے شروع کی جائے گی، جبکہ متاثرہ تاجروں اور بے روزگار ہونے والے خاندانوں کی بحالی کے لیے خصوصی کمیٹی قائم کر دی گئی ہے۔
