کراچی، 19 جنوری 2026 — ٹک ٹاک نے اپنی Q3 2025 کمیونٹی گائیڈ لائنز انفورسمنٹ رپورٹ جاری کر دی ہے، جس میں صارفین کے لیے ایک محفوظ ڈیجیٹل ماحول یقینی بنانے کے لیے کیے گئے اقدامات کی تفصیل دی گئی ہے۔ یہ رپورٹ جولائی تا ستمبر 2025 کے اعداد و شمار پر مشتمل ہے اور پلیٹ فارم پر کمیونٹی گائیڈ لائنز کی خلاف ورزی کرنے والے مواد کے خلاف کی گئی کارروائیوں کو اجاگر کرتی ہے۔
رپورٹ کے مطابق، Q3 2025 کے دوران پاکستان میں مجموعی طور پر 2 کروڑ 81 لاکھ 98 ہزار 284 ویڈیوز کمیونٹی گائیڈ لائنز کی خلاف ورزی پر ہٹائی گئیں۔ پاکستان میں پروایکٹو ریموول ریٹ 99.8 فیصد رہا، جبکہ 95.9 فیصد ویڈیوز 24 گھنٹوں کے اندر حذف کر دی گئیں۔ ٹک ٹاک کے مطابق، جدید ٹیکنالوجی کے استعمال سے سیفٹی ٹیمیں ایسے معاملات پر زیادہ توجہ دے سکتی ہیں جن میں انسانی فیصلہ ضروری ہو، جیسے اپیلز کا جائزہ، ماہرین سے رہنمائی اور تیزی سے بدلتی صورتحال پر ردِعمل۔
عالمی سطح پر، اس سہ ماہی کے دوران 204 ملین (204,534,932) ویڈیوز پلیٹ فارم سے ہٹائی گئیں، جو کہ اپ لوڈ ہونے والے مجموعی مواد کا تقریباً 0.7 فیصد بنتا ہے۔ ان میں سے 186,608,081 ویڈیوز خودکار ٹیکنالوجی کے ذریعے شناخت کر کے ہٹائی گئیں، جبکہ مزید جائزے کے بعد 8,950,735 ویڈیوز بحال بھی کی گئیں۔ عالمی سطح پر پروایکٹو ریموول ریٹ 99.3 فیصد رہا اور 94.8 فیصد مواد 24 گھنٹوں کے اندر ہٹا دیا گیا۔
پلیٹ فارم کی سالمیت کو برقرار رکھنے کے لیے، اس سہ ماہی میں 118,618,399 جعلی اکاؤنٹس حذف کیے گئے، جبکہ 22,226,542 ایسے اکاؤنٹس بھی ہٹائے گئے جن کے بارے میں شبہ تھا کہ وہ 13 سال سے کم عمر صارفین کے ہیں۔
رپورٹ کے مطابق، حذف کی گئی ویڈیوز میں سے 30 فیصد میں حساس یا بالغ موضوعات شامل تھے جو ٹک ٹاک کی پالیسی سے مطابقت نہیں رکھتے تھے۔ مزید 15.7 فیصد ویڈیوز سیفٹی اور شائستگی کے اصولوں کی خلاف ورزی پر، جبکہ 2.7 فیصد پرائیویسی اور سیکیورٹی گائیڈ لائنز کی خلاف ورزی پر ہٹائی گئیں۔ اس کے علاوہ، 32.9 فیصد ویڈیوز غلط معلومات، جبکہ 34.4 فیصد ویڈیوز ایڈیٹڈ میڈیا اور اے آئی سے تیار کردہ مواد کے زمرے میں آئیں۔
کمیونٹی گائیڈ لائنز انفورسمنٹ رپورٹ کی باقاعدہ اشاعت ٹک ٹاک کی شفافیت اور ذمہ داری کے عزم کی عکاسی کرتی ہے۔ Q3 2025 رپورٹ سے متعلق مزید تفصیلات اور ٹک ٹاک کی مواد سے متعلق پالیسیز، ٹولز اور گائیڈ لائنز جاننے کے لیے ٹک ٹاک ٹرانسپیرنسی سینٹر وزٹ کیا جا سکتا ہے، جو اردو اور انگریزی دونوں زبانوں میں دستیاب ہے۔
