کراچی: پاکستان رینجرز (سندھ) نے خفیہ اطلاعات کی بنیاد پر کراچی کے مختلف علاقوں پرانا گولیمار، پاک کالونی اور ناظم آباد میں کارروائیاں کرتے ہوئے کاشف ڈاڈا اور ریاست جدگال گینگ سے تعلق رکھنے والے 9 ملزمان کو گرفتار کرلیا۔
گرفتار ملزمان میں ارسلان عرف مٹھو، لیاقت علی عرف کمانڈو، آشر، عیشان صفدر عرف شانو، رضوان عرف ٹینڈو، محمد احمد، نعمان، ندیم اور سجاد شامل ہیں۔
کارروائیوں کے دوران ملزمان کے قبضے سے 4 پسٹل بمعہ ایمونیشن، 363 ٹوکن کرسٹل، 8.35 کلوگرام چرس، 25 ٹوکن آئس، 48 شراب کی بوتلیں، 150 کلوگرام گٹکا، 1490 پیکٹ ماوا، 18 موبائل فونز اور 41 لاکھ 37 ہزار 400 روپے نقدی برآمد کرلی گئی۔
ترجمان رینجرز کے مطابق گرفتار ملزمان منظم جرائم پیشہ نیٹ ورکس کا حصہ ہیں جو شہر کے مختلف علاقوں میں اسلحے کے زور پر ڈکیتی، منشیات فروشی، موٹر سائیکل اور موبائل فون چھیننے کی وارداتوں میں ملوث رہے ہیں۔
ملزمان عادی مجرم ہیں اور ان کے خلاف شہر کے مختلف تھانوں میں مقدمات درج ہیں، جبکہ دیگر ساتھیوں کی گرفتاری کے لیے چھاپے مارے جارہے ہیں۔
گرفتار ملزمان کو برآمد شدہ اسلحہ، منشیات اور دیگر مسروقہ سامان سمیت مزید قانونی کارروائی کے لیے پولیس کے حوالے کردیا گیا ہے۔
رینجرز نے عوام سے اپیل کی ہے کہ مشتبہ عناصر کے بارے میں فوری طور پر قریبی رینجرز چیک پوسٹ، ہیلپ لائن 1101 یا مددگار واٹس ایپ نمبر 0347-9001111 پر اطلاع دیں، اطلاع دینے والے کا نام صیغہ راز میں رکھا جائے گا۔
