لاہور: لاہور کے علاقے جوہر ٹاؤن سے نجی کالج کے چیف ایگزیکٹو آفیسر کو اغوا کرلیا گیا، جس کے بعد قانون نافذ کرنے والے اداروں نے تفتیش شروع کردی ہے۔
پولیس کے مطابق عابد وزیر خان کے اغوا کا مقدمہ مغوی کے بھائی کی مدعیت میں درج کرلیا گیا ہے۔ واقعہ اس وقت پیش آیا جب عابد وزیر خان آفس سے روانہ ہو رہے تھے کہ نامعلوم افراد نے ان کی گاڑی روک کر انہیں اغوا کرلیا۔
ایف آئی آر کے مطابق اغوا کے وقت عابد وزیر خان کالج کی خاتون جنرل مینجر سے فون پر بات کر رہے تھے، اس دوران خاتون نے فون پر ایک نامعلوم شخص کی آواز سنی جس نے مغوی سے کہا کہ تم نے میری گاڑی کا ایکسیڈنٹ کیا ہے۔
واقعے کے بعد کرائم کنٹرول ڈیپارٹمنٹ (سی سی ڈی) سمیت دیگر قانون نافذ کرنے والے اداروں نے مغوی کی بازیابی اور ملزمان کی گرفتاری کے لیے تحقیقات کا آغاز کردیا ہے۔
