پشاور: محکمہ ایکسائز، ٹیکسیشن و نارکوٹکس کنٹرول نے منشیات کے خلاف جاری کارروائیوں کے دوران ضلع خیبر میں بڑی کامیابی حاصل کرتے ہوئے بھاری مقدار میں منشیات برآمد کر کے ضبط کر لی ہیں۔
حکام کے مطابق ضلع خیبر کے دور دراز علاقوں میں دیگر قانون نافذ کرنے والے اداروں کے تعاون سے کی گئی کارروائی کو اب تک کی سب سے بڑی انسدادِ منشیات کارروائی قرار دیا جا رہا ہے، جس میں مجموعی طور پر 7 لاکھ 18 ہزار 60 گرام منشیات برآمد کی گئیں۔
برآمد شدہ منشیات میں 6 لاکھ 15 ہزار 500 گرام بھنگ، 18 ہزار 100 گرام آئس، 70 ہزار گرام چرس اور 1 ہزار 160 گرام ہیروئن شامل ہیں۔ اس کے علاوہ 13 ہزار 300 گرام افیون اور 18 ایکسٹیسی گولیاں بھی ضبط کر لی گئیں۔
محکمہ ایکسائز کے مطابق منشیات ضبط کر کے ملزمان کے خلاف مقدمات درج کر لیے گئے ہیں جبکہ مزید تفتیش جاری ہے۔ کارروائی ایکسائز انٹیلیجنس بیورو اور تھانہ ایکسائز خیبر نے مشترکہ طور پر انجام دی۔
صوبائی وزیر سید فخر جہان نے کہا ہے کہ منشیات فروشوں اور اسمگلرز کے خلاف زیرو ٹالرنس پالیسی کے تحت بلاامتیاز کارروائیاں جاری رکھی جائیں گی اور صوبے کو منشیات کے ناسور سے پاک کرنے کے لیے ہر ممکن اقدامات کیے جائیں گے۔
