کراچی: جامعہ جناح سندھ میڈیکل یونیورسٹی میں پاکستان اور چین کے سفارتی تعلقات کی 75ویں سالگرہ کے موقع پر پرچم کشائی اور پینل ڈسکشن کا اہتمام کیا گیا۔ تقریب میں فیکلٹی ممبران، طلبہ اور معزز مہمانوں نے شرکت کی اور پاک چین دوستی کو خراجِ تحسین پیش کیا۔
تقریب کا آغاز پاکستان اور چین کے قومی پرچم لہرانے سے ہوا، جس کے بعد دونوں ممالک کے قومی ترانے بجائے گئے۔ اس موقع پر مقررین نے دونوں ملکوں کے درمیان سات دہائیوں پر محیط مضبوط تعلقات کو سراہا۔
پینل ڈسکشن کی قیادت ڈائریکٹر کوالٹی انہانسمنٹ سیل ڈاکٹر عبدالواحد عثمانی نے کی۔ اس موقع پر یونیورسٹی آف کراچی کے کونفیوشس انسٹیٹیوٹ کے ڈائریکٹر ڈاکٹر محمد ناصر الدین خان نے چینی زبان کی تعلیم کو ثقافتی تعلقات کے فروغ کا اہم ذریعہ قرار دیا۔ دیگر مقررین نے بھی تعلیمی اور ثقافتی تعاون کو وقت کی ضرورت قرار دیا۔
شیخ الجامعہ پروفیسر امجد سراج میمن نے کہا کہ پاک چین دوستی "آئرن برادرز” کی مثال ہے۔ انہوں نے زور دیا کہ ہمیں چین کے نظم و ضبط اور محنت کے اصولوں سے سیکھنا چاہیے اور تحقیقی شراکت داری کو مزید مضبوط بنانا چاہیے۔
پرو وائس چانسلر ڈاکٹر نگہت شاہ نے کہا کہ یونیورسٹی چینی اداروں کے ساتھ علمی روابط بڑھانے کے لیے پرعزم ہے تاکہ آنے والی نسلیں اس دوستی کو آگے بڑھا سکیں۔
تقریب کے اختتام پر رجسٹرار ڈاکٹر اعظم خان نے مہمانوں کا شکریہ ادا کیا۔ انتظامات ایونٹ آرگنائزنگ کمیٹی نے انجام دیے جن میں ڈاکٹر نازش جعفر، سہراب زمان، آصفیہ عزیز اور زہرہ سیمین شامل تھیں۔
