کراچی: علیگڑھ انسٹیٹیوٹ آف ٹیکنالوجی (AIT) کے شعبہ الیکٹریکل کے تحت “انسانی جسم کی مزاحمت، برقی رو اور انسانی حفاظتی اقدامات” کے موضوع پر ایک اہم اور معلوماتی سیمینار منعقد ہوا۔ سیمینار میں طلبہ اور اساتذہ نے بڑی تعداد میں شرکت کی۔
مہمانِ خصوصی محمد غیاث جیلانی نے خطاب کرتے ہوئے بتایا کہ برقی رو انسانی جسم پر کس طرح اثر انداز ہوتی ہے اور اس سے بچاؤ کے لیے عالمی معیار کے حفاظتی اقدامات اپنانا کیوں ضروری ہے۔ انہوں نے گراؤنڈنگ سسٹم اور صنعتی سیفٹی پروٹوکولز کی اہمیت پر بھی روشنی ڈالی اور طلبہ کو عملی مہارت حاصل کرنے کی تلقین کی۔
پرنسپل شاہد جمیل نے کہا کہ الیکٹریکل کے شعبے میں حفاظتی آگاہی بہت ضروری ہے اور اسی مقصد کے لیے یہ سیمینار منعقد کیا گیا۔ کنوینر سید محمد محسن کاظم کے مطابق یہ نشست طلبہ کی پیشہ ورانہ تربیت میں اہم کردار ادا کرے گی۔
پروگرام کے کامیاب انعقاد میں سربراہ شعبہ الیکٹریکل انجینئر اکرام علی اور انسٹرکٹر ارشاد احمد کا کردار نمایاں رہا۔ تقریب کے اختتام پر مہمانِ خصوصی کو ادارے کی جانب سے شیلڈ پیش کی گئی۔
