کراچی: اسماعیل انڈسٹریز لمیٹڈ نے علیگڑھ انسٹیٹیوٹ آف ٹیکنالوجی میں ڈپلومہ آف ایسوسی ایٹ انجینئر کے طلبہ کے لیے کامیاب ریکروٹمنٹ ڈرائیو کا انعقاد کیا، جس میں 40 طلبہ نے شرکت کی۔
ڈرائیو میں الیکٹریکل، الیکٹرانکس اور مکینیکل شعبہ جات کے فارغ التحصیل طلبہ کے انٹرویوز لیے گئے۔ اسماعیل انڈسٹریز، جو 1988 سے کنفیکشنری، بسکٹ، چپس اور آٹا سمیت مختلف مصنوعات تیار کر رہی ہے، نے طلبہ کو عملی میدان میں داخل ہونے کے مواقع فراہم کیے۔
پرنسپل شاہد جمیل کے مطابق، اس نوعیت کی سرگرمیاں طلبہ کے روشن مستقبل کے لیے نہایت اہم ہیں اور انہیں پیشہ ورانہ دنیا میں قدم رکھنے میں مدد دیتی ہیں۔
کنوینر سید محمد محسن کاظم نے کہا کہ اسماعیل انڈسٹریز نے ادارے کے ہنرمند طلبہ کو صنعت سے جوڑنے میں نمایاں کردار ادا کیا ہے، جو ایک مضبوط تعلیمی و صنعتی تعلق کی مثال ہے۔
پروگرام کے انعقاد میں شعبہ DIIL کے کردار کو بھی سراہا گیا، جس نے بہترین انتظامات کے ذریعے اس ڈرائیو کو کامیاب بنایا۔ طلبہ نے اس موقع کو اپنے کیریئر کے لیے اہم پیش رفت قرار دیا۔
