پاکستان نے امریکا کے قبضے میں لیے گئے بحری جہازوں پر موجود پاکستانی اور ایرانی شہریوں کی محفوظ واپسی کے لیے سنگاپور سے مدد طلب کر لی۔
نائب وزیراعظم اور وزیرِ خارجہ اسحاق ڈار نے کہا کہ انہوں نے سنگاپور کے وزیرِ خارجہ ویوین بالاکرشنن سے گفتگو کی اور سنگاپور کے پانیوں کے قریب موجود 11 پاکستانی اور 20 ایرانی ملاحوں کی واپسی میں تعاون کی درخواست کی۔
اسحاق ڈار کے مطابق انہوں نے اس معاملے پر ایرانی وزیرِ خارجہ عباس عراقچی سے بھی بات کی، جبکہ پاکستان اور ایران اس معاملے پر قریبی رابطے میں ہیں۔ پاکستان نے ایرانی شہریوں کی پاکستان کے راستے ایران محفوظ واپسی میں سہولت فراہم کرنے کی پیشکش بھی کی ہے۔
یہ پیش رفت ایسے وقت سامنے آئی ہے جب چند روز قبل پاکستان نے امریکا کے قبضے میں لیے گئے ایک ایرانی بحری جہاز کے عملے کی منتقلی میں سہولت فراہم کی تھی، جسے علاقائی کشیدگی کے دوران اعتماد سازی کا اقدام قرار دیا گیا۔
حکام کا کہنا ہے کہ کوششوں کا مقصد ملاحوں کی حفاظت یقینی بنانا اور سفارتی ذرائع سے ان کی وطن واپسی کا انتظام کرنا ہے.
