گلگت بلتستان الیکشن کمیشن نے پانچ انتخابی حلقوں کے مخصوص پولنگ اسٹیشنز پر دوبارہ پولنگ کرانے کا فیصلہ کر لیا ہے۔ میڈیا کوآرڈینیٹر بہادر جمیل کے مطابق یہ فیصلہ چیف الیکشن کمشنر کی منظوری سے کیا گیا، جبکہ صوبائی الیکشن کمشنر عابد رضا نے ری پولنگ کے باضابطہ احکامات جاری کر دیے ہیں۔
الیکشن کمیشن کے مطابق جن حلقوں میں دوبارہ پولنگ ہوگی ان میں GBA-8 سکردو-II، GBA-13 استور-I، GBA-15 دیامر-I، GBA-16 دیامر-II اور GBA-17 دیامر-III شامل ہیں۔ ری پولنگ صرف ان مخصوص پولنگ اسٹیشنز پر کرائی جائے گی جہاں انتخابی عمل سے متعلق شکایات یا بے ضابطگیوں کی نشاندہی ہوئی ہے۔
دوسری جانب گلگت بلتستان انتخابات کے سرکاری نتائج بھی بتدریج سامنے آ رہے ہیں۔ اب تک 24 میں سے 19 حلقوں کے نتائج موصول ہو چکے ہیں، جن سے سیاسی جماعتوں اور آزاد امیدواروں کے درمیان سخت مقابلے کی صورتحال ظاہر ہوتی ہے۔
جاری کردہ نتائج کے مطابق پاکستان پیپلز پارٹی (PPP) 9 نشستوں کے ساتھ سب سے آگے ہے، جبکہ پاکستان مسلم لیگ (ن) اور آزاد امیدوار 5، 5 نشستیں حاصل کرنے میں کامیاب رہے ہیں۔ مجلس وحدت المسلمین (MWM) نے ایک نشست اپنے نام کی ہے۔
باقی ماندہ حلقوں کے نتائج کا انتظار کیا جا رہا ہے، جبکہ انتخابی عمل مختلف علاقوں میں جاری ہے۔ حتمی نتائج کے بعد گلگت بلتستان کی سیاسی صورتحال مزید واضح ہو سکے گی
