سان فرانسسکو: واٹس ایپ نے آئی او ایس (iOS) بیٹا ورژن میں میسج اینیمیشن فیچر دوبارہ متعارف کرانے کی آزمائش شروع کر دی ہے، جس کے ساتھ صارفین کو اسے بند یا فعال کرنے کا اختیار بھی دیا جا رہا ہے۔
وا بیٹا انفو (WABetaInfo) کی رپورٹ کے مطابق ایپل کے ٹیسٹ فلائٹ پلیٹ فارم پر دستیاب واٹس ایپ کے تازہ ترین آئی او ایس بیٹا ورژن میں نئی میسج اینیمیشن شامل کی گئی ہے، جسے فی الحال محدود تعداد میں صارفین آزما رہے ہیں۔
یہ پیش رفت ایک ہفتے بعد سامنے آئی ہے جب واٹس ایپ نے اینڈرائیڈ بیٹا ورژن میں بھی اینیمیشنز کے لیے علیحدہ سیٹنگ متعارف کرائی تھی۔ صارفین Settings > Chats > Animations میں جا کر میسجز، ایموجیز، اسٹیکرز اور GIFs کی اینیمیشنز کو الگ الگ کنٹرول کر سکتے ہیں۔
یاد رہے کہ واٹس ایپ نے ایک سابقہ اپ ڈیٹ میں آئی فون ایپ سے میسج اینیمیشن فیچر ہٹا دیا تھا، جس کے بعد پیغامات بغیر کسی بصری اثر کے ظاہر ہوتے تھے۔ اب تازہ ترین بیٹا ورژن WhatsApp for iOS 26.24.10.70 میں یہ فیچر نئے انداز کے ساتھ واپس لایا جا رہا ہے۔
نئے ڈیزائن کے تحت میسج ببل فوری طور پر ظاہر ہونے کے بجائے ہلکے انداز میں نمودار ہوتا ہے اور گفتگو میں شامل ہونے سے پہلے معمولی طور پر بڑا ہو کر ایک ہموار اینیمیشن اثر پیدا کرتا ہے۔
فی الحال یہ فیچر صرف محدود تعداد میں بیٹا ٹیسٹرز کے لیے دستیاب ہے اور عام صارفین تک اس کی رسائی نہیں دی گئی۔
واٹس ایپ کی جانب سے اس فیچر کی باضابطہ ریلیز کی تاریخ کا اعلان نہیں کیا گیا، تاہم آئی او ایس اور اینڈرائیڈ دونوں پلیٹ فارمز پر جاری آزمائشی مرحلے سے ظاہر ہوتا ہے کہ اسے جلد تمام صارفین کے لیے متعارف کرایا جا سکتا ہے۔
