کیلیفورنیا — گوگل نے اپنے ڈیجیٹل والیٹ میں ایک نئے اور کارآمد فیچر کا اضافہ کیا ہے جس کی مدد سے صارف اپنے مختلف آن لائن آرڈرز اور پارسلز کی نقل و حرکت کی معلومات براہِ راست والیٹ ایپ کے اندر دیکھ سکیں گے۔ اس نئے فیچر کے تحت، نظام صارف کے جی میل ان باکس میں آنے والی ڈیجیٹل رسیدوں اور ٹریکنگ نمبرز کو خودکار طور پر اسکین کرے گا اور ان کی مدد سے پارسل کی تازہ ترین صورتحال کو گوگل والیٹ کی مرکزی اسکرین پر ظاہر کر دے گا۔ جلد پہنچنے والے پارسلز کو ادائیگی کے کارڈز کے ساتھ اوپر نمایاں کیا جائے گا تاکہ صارف ایک کلک پر تفصیلی معلومات حاصل کر سکے۔
پارسل موصول ہو جانے کے بعد صارف اسے اپنی فعال فہرست سے دستی طور پر ہٹا بھی سکتا ہے، جبکہ کمپنی اس عمل کو مستقبل میں مکمل طور پر خودکار بنانے پر کام کر رہی ہے۔ گوگل کی جانب سے واضح کیا گیا ہے کہ اس نئے متبادل سے جی میل میں موجود اصل ای میلز یا ان کی ترتیب پر کوئی اثر نہیں پڑے گا۔ اس تشخیصی نظام سے فائدہ اٹھانے کے لیے صارفین کو اپنے جی میل کی ترتیبات میں جا کر ‘گوگل ورک اسپیس اسمارٹ فیچرز’ کے آپشن کو فعال کرنا ہوگا۔ فی الوقت یہ جدید سہولت صرف امریکا میں مقیم صارفین کے لیے متعارف کرائی گئی ہے جو زیادہ تر بڑے کاروباری اداروں اور اسٹورز کے ای میل فارمیٹس کو سپورٹ کرتی ہے، تاہم تمام چھوٹے آن لائن اسٹورز کے لیے اس کی مکمل مطابقت کی ضمانت نہیں دی گئی۔
