کیوپرٹینو — ٹیک کمپنی ایپل اپنے آنے والے ‘آئی پیڈ منی’ کے لیے ایک انقلابی ڈیزائن پر کام کر رہی ہے، جس کے تحت اکتوبر 2026 تک کمپنی کی تاریخ کا پہلا واٹر ریزسٹنٹ (پانی سے محفوظ) آئی پیڈ مارکیٹ میں متعارف کروائے جانے کا امکان ہے۔ بلومبرگ کے معروف تجزیہ کار مارک گورمین اور صنعتی ذرائع کے مطابق، ایپل اس ٹیبلٹ کو پانی سے محفوظ بنانے کے لیے روایتی سپیکر کے سوراخوں کو مکمل طور پر ختم کر رہا ہے۔ اس کے بجائے ایک جدید وائبریشن سسٹم استعمال کیا جائے گا جو آئی پیڈ کی باڈی کی فلیٹ سطح کو ہلکا سا وائبریٹ کر کے آواز پیدا کرے گا، جس سے پانی اور دھول مٹی کے اندر جانے کا سب سے بڑا راستہ بند ہو جائے گا۔ یہ طریقہ کار آئی فون میں استعمال ہونے والے گاسکیٹ اور گلونگ سسٹم سے بالکل مختلف ہے۔
پانی سے بچاؤ کی اس خصوصیت کے علاوہ، امسال آئی پیڈ منی میں چار بڑی تبدیلیاں متوقع ہیں۔ جنوبی کوریا کی رپورٹ کے مطابق، سیمسنگ ڈسپلے نے اس ڈیوائس کے لیے 8.4 انچ کے او ایل ای ڈی (OLED) پینلز کی بڑے پیمانے پر پیداوار شروع کر دی ہے۔ ایل سی ڈی اسکرین کے مقابلے میں او ایل ای ڈی ٹیکنالوجی صارفین کو بہترین کنٹراسٹ، گہرا سیاہ رنگ اور بیٹری کی بچت فراہم کرے گی، تاہم یہ پینل 60 ہرٹز ایل ٹی پی ایس (LTPS) ڈیزائن پر مبنی ہوگا یعنی اس میں پرو موشن فیچر شامل نہیں ہوگا۔ واضح رہے کہ ایپل نے آخری بار اکتوبر 2024 میں آئی پیڈ منی کو اے 17 پرو چِپ اور ایپل انٹیلیجنس کے ساتھ اپ ڈیٹ کیا تھا، اور اب دو سال بعد اس سیریز میں یہ اب تک کی سب سے بڑی تبدیلی ہوگی۔
