نیویارک — ہالی ووڈ کی معروف پاپ گلوکارہ الیویا روڈریگو کی ایک مبینہ میوزک ویڈیو کے سیٹ سے تصاویر لیک ہونے کے بعد انٹرنیٹ پر مداحوں کی جانب سے قیاس آرائیوں کا طوفان کھڑا ہو گیا ہے۔ نیویارک سٹی کے ایک بوٹینیکل گارڈن (باغ) میں مداحوں نے پروڈکشن کی ایسی متعدد اشیاء اور آلات کو دیکھا جن پر 23 سالہ گلوکارہ کا نام درج تھا، جس سے یہ واضح ہو گیا کہ وہاں کسی بڑی ویڈیو پر کام جاری ہے۔ اس خبر کے سامنے آتے ہی سوشل میڈیا پلیٹ فارم ایکس (X) پر مداحوں نے شوٹنگ کے ماحول اور کہانی کے حوالے سے مختلف نظریات پیش کرنا شروع کر دیے ہیں۔
مداحوں کی ایک بڑی تعداد کا ماننا ہے کہ یہ میوزک ویڈیو ان کے مقبول گانے "میگٹس فار برینز” (Maggots for Brains) کے لیے شوٹ کی جا رہی ہے، جبکہ کچھ کا کہنا ہے کہ یہ ویڈیو "ہنی بی” یا "ایکسپیکٹیشنز” جیسے گانوں کی ہونی چاہیے۔ سوشل میڈیا پر ہونے والی بحث میں کچھ صارفین نے یہ انکشاف بھی کیا کہ حال ہی میں الیویا روڈریگو اپنے عملے کے ہمراہ آئس لینڈ میں بھی دیکھی گئی تھیں، جس سے لگتا ہے کہ وہ مختلف ممالک کے خوبصورت اور الگ مناظر پر مبنی ایک وسیع پروجیکٹ تیار کر رہی ہیں۔ کچھ مداحوں نے یہ امید بھی ظاہر کی ہے کہ یہ خوبصورت سیٹ ‘اسپائیڈر مین’ فلم کے کسی نئے گانے کا بھی ہو سکتا ہے۔
