ممبئی: بالی ووڈ اداکارہ شلپا شیٹی اور اُن کے شوہر راج کُندرا ایک بار پھر قانونی مشکلات میں گھر گئے ہیں۔ ممبئی پولیس کی Economic Offences Wing (EOW) نے ساٹھ کروڑ روپے سے زائد کے مبینہ مالی فراڈ کیس میں تحقیقات کا دائرہ مزید وسیع کر دیا ہے۔
ذرائع کے مطابق شلپا شیٹی سے چار گھنٹے سے زائد وقت تک تفتیش کی گئی۔ پولیس افسران اُن کے گھر پہنچے اور اُن کا بیان ریکارڈ کیا۔ تفتیش کا محور اُن کی کمپنی Best Deal TV Pvt Ltd تھی، جس میں اُن کے شوہر راج کُندرا بھی شراکت دار ہیں۔
یہ کیس ایک تاجر دیپک کوٹھاری کی جانب سے درج کرایا گیا، جنہوں نے الزام عائد کیا ہے کہ ۲۰۱۵ سے ۲۰۲۳ کے دوران انہوں نے شلپا اور کُندرا کی کمپنی میں بھاری سرمایہ کاری کی، لیکن رقم کاروباری مقاصد کے بجائے ذاتی اخراجات میں استعمال کی گئی۔
تحقیقات کے مطابق شلپا شیٹی نے ۲۰۱۶ میں کمپنی سے بطور ڈائریکٹر استعفیٰ دے دیا تھا، تاہم مالی بے ضابطگیاں اس کے بعد بھی جاری رہیں۔
پولیس نے دونوں میاں بیوی کے خلاف Look Out Circular (LOC) جاری کر دیا ہے تاکہ وہ ملک سے باہر سفر نہ کر سکیں۔ اسی دوران بمبئی ہائی کورٹ نے شلپا اور راج کُندرا کی فوکٹ (Phuket) جانے کی درخواست مسترد کر دی۔
اداکارہ کے وکیل نے تمام الزامات کو "جھوٹا، بے بنیاد اور بدنیتی پر مبنی” قرار دیتے ہوئے کہا ہے کہ شلپا کا اس فراڈ سے کوئی تعلق نہیں۔ اُنہوں نے واضح کیا کہ شلپا کمپنی سے ۲۰۱۶ میں الگ ہو چکی تھیں اور بعد میں ہونے والے مالی معاملات میں اُن کی کوئی شمولیت نہیں۔
راج کُندرا پہلے بھی متعدد تنازعات میں پھنس چکے ہیں، جن میں ۲۰۲۱ کا پورنوگرافی اسکینڈل شامل ہے، جس میں اُنہیں گرفتار بھی کیا گیا تھا۔ اب ایک بار پھر اُن کے خلاف بڑے مالی اسکینڈل کے الزامات سامنے آنے کے بعد سوشل میڈیا پر شدید بحث چھڑ گئی ہے۔
ذرائع کے مطابق EOW دونوں کے بینک اکاؤنٹس، لین دین کے ریکارڈز اور کمپنی کے مالی دستاویزات کا باریک بینی سے جائزہ لے رہی ہے۔ مزید بیانات آئندہ دنوں میں ریکارڈ کیے جانے کا امکان ہے
