کراچی: مقامی مارکیٹ میں مسلسل سات روز تک اضافے کے بعد جمعرات کو سونے کی قیمت میں کمی ریکارڈ کی گئی، جبکہ عالمی مارکیٹ میں بھی سونے کی قیمت 35 ڈالر فی اونس کم ہوکر 4,380 ڈالر ہوگئی۔
آل پاکستان جیمز اینڈ جیولرز صرافہ ایسوسی ایشن کے مطابق مقامی مارکیٹ میں سونے کی فی تولہ قیمت 3,500 روپے کمی کے بعد 460,436 روپے ہوگئی۔ 10 گرام سونے کی قیمت بھی 3,001 روپے کم ہوکر 394,749 روپے پر آگئی۔
چاندی کی قیمت میں بھی عالمی اور مقامی مارکیٹ میں کمی ہوئی۔ عالمی مارکیٹ میں چاندی کی قیمت 1.75 ڈالر کم ہوکر 64.57 ڈالر فی اونس ہوگئی۔
مقامی مارکیٹ میں چاندی کی فی تولہ قیمت 175 روپے کمی کے بعد 6,936 روپے ہوگئی، جبکہ 10 گرام چاندی 150 روپے کمی سے 5,946 روپے کی ہوگئی۔
اس سے ایک روز قبل سونے کی قیمت میں 4,200 روپے فی تولہ اضافہ ہوا تھا اور قیمت 463,936 روپے تک پہنچ گئی تھی، جبکہ عالمی مارکیٹ میں سونا 42 ڈالر اضافے کے بعد 4,415 ڈالر فی اونس پر پہنچ گیا تھا۔
حالیہ کمی سے قبل قیمتی دھاتوں کی قیمتوں میں مسلسل کئی روز تک تیزی دیکھی گئی تھی۔
