لاہور: وزیراعلیٰ پنجاب مریم نواز شریف نے لاہور کے جناح انسٹی ٹیوٹ آف کارڈیالوجی میں پاکستان کے پہلے باقاعدہ ہارٹ ٹرانسپلانٹ مرکز کا افتتاح کردیا ہے۔
مریم نواز شریف ہارٹ ٹرانسپلانٹ سینٹر کے نام سے قائم کیے گئے اس مرکز میں جدید طبی ٹیکنالوجی اور جدید آلات نصب کیے گئے ہیں، جہاں مستحق مریضوں کو دل کی پیوند کاری کا علاج مکمل طور پر مفت فراہم کیا جائے گا۔
مریم نواز نے سوشل میڈیا پر مرکز کے افتتاح کا اعلان کرتے ہوئے کہا کہ پنجاب حکومت اہل اور مستحق مریضوں کے علاج کے تمام اخراجات برداشت کرے گی۔
وزیراعلیٰ نے کہا کہ جناح انسٹی ٹیوٹ آف کارڈیالوجی میں ہارٹ ٹرانسپلانٹ کے تمام مراحل بالکل مفت انجام دیے جائیں گے۔ ان کے مطابق عام طور پر دل کی پیوند کاری ایک مہنگا علاج ہے اور حکومت فی ٹرانسپلانٹ 50 ہزار ڈالر تک اخراجات برداشت کرنے کے لیے تیار ہے، تاہم چینی ٹیکنالوجی کے استعمال سے یہ لاگت تقریباً 10 ہزار ڈالر تک لانے کی کوشش کی جائے گی تاکہ زیادہ سے زیادہ مریض اس سہولت سے فائدہ اٹھا سکیں۔
دورے کے دوران مریم نواز نے ہارٹ ٹرانسپلانٹ مرکز، انجیوگرافی سوٹ، تشخیصی کمروں، آؤٹ پیشنٹ شعبے اور دیگر حصوں کا معائنہ کیا۔
انہوں نے ماڈیولر آپریشن تھیٹر میں نصب جدید طبی آلات کا بھی جائزہ لیا، جن میں ہارٹ لیگ مشین، جدید ٹیسلا ایم آر آئی اور دیگر اعلیٰ معیار کی طبی مشینری شامل ہے۔
پنجاب کی وزیر اطلاعات عظمیٰ بخاری نے بتایا کہ جناح انسٹی ٹیوٹ آف کارڈیالوجی نے باقاعدہ طور پر کام شروع کردیا ہے اور یہاں دل کی پیوند کاری کا علاج مکمل طور پر مفت فراہم کیا جائے گا۔
انہوں نے کہا کہ لاہور کی بڑھتی ہوئی آبادی اور پنجاب انسٹی ٹیوٹ آف کارڈیالوجی پر بڑھتے ہوئے دباؤ کے پیش نظر یہ نیا مرکز قائم کیا گیا ہے۔
عظمیٰ بخاری کے مطابق وزیراعلیٰ مریم نواز کی ہدایات پر یہ منصوبہ مختصر مدت میں مکمل کیا گیا تاکہ صوبے کی بڑھتی ہوئی طبی ضروریات پوری کی جاسکیں۔
انہوں نے مزید بتایا کہ مریم نواز جلد نواز شریف کینسر ہسپتال کا بھی افتتاح کریں گی، جس میں ایک ہزار بستروں کی گنجائش ہوگی۔
وزیر اطلاعات کے مطابق سرگودھا میں کارڈیالوجی ہسپتال کا منصوبہ بھی تکمیل کے قریب ہے، جبکہ پنجاب بھر کے سرکاری ہسپتال ملک کے مختلف علاقوں سے آنے والے مریضوں کو مفت علاج کی سہولیات فراہم کر رہے ہیں۔
